心安🤗富足

而家咁嘅時勢,想做好人真係唔容易,要有信心、勇氣同毅力。

地球上壞人其實唔多,只係能夠堅持原則嘅好人比較少啫!

「施比受更為有福」,請問:您願意當個施者,定係做個受者呢?

睇見呢個話題,大家可能會笑;尤其是喺呢個拜金主義發揮到瘋狂嘅時候。嗰啲將畢菲特奉為神明,並且將收到「股神」嘅一封回信嗰件大事,放喺自己網誌最搶眼嘅位置上面炫耀,又成日諗住可以挖掘出啲會大升一百幾拾倍嘅仙屎股,發大逹嘅白痴。

既然財富咁重要,為咗自己個荷包腫脹,就會無所不為,唔理人哋嘅死活,甚至禍延子孫嘞。所以有地溝油,毒奶粉等等等等,數都數唔曬嘅「食品」出現;又有迷你債券,種錢樹,比特幣種種「投資產品」面世。「笑貧不笑娼」,「有錢大晒」種種觀念,亦都畀拜金一族廣泛傳揚接受。貧窮變成罪惡,備受剝削、歧視與侵凌。

專制世襲既得利益集圑、富商巨賈同埋金融投資巿場各種各樣嘅大鱷,就喺肥到超大碼嘅褲管都穿唔過,仲要睇吓乞兒兜裡邉仲有冇油水可撈,思想與生活內容貧乏到只有孔方兄!

冇錢梗係萬萬不能啦,因為我哋唔識餐風飲露,騰雲駕霧,同住喺蓬萊仙境;之不過,錢都唔係萬能嘅。錢可以買到靈丹妙藥,但係買唔到健康長壽;錢可以沽名釣譽,但係得唔到由衷嘅敬慕之情;錢可以買到美麗嘅軀殼,但係買唔到真摯嘅感情;錢可以買到逢迎巴結,但係買唔到肝膽相照嘅友情;有錢可以穿戴滿身時尚品牌服飾、嚐盡寰宇美食佳餚、身居豪宅、出入用名車、私人遊艇同飛機,甚至於遨遊太空,但係買唔到一家和順,樂也融融!

講到尾,人生究竟追求啲咩?不過係健康同埋幸福。幸福同快活都只係感覺,唔係以億兆計嘅身外之物。

普通人只係希望快快活活咁過日子;偉大啲,就係幫吓自己家人與共啲親朋戚友,等大家嘅日子都好過。仲有能力嘅話,去做吓義工,捐啲錢畀志工與共慈善團體,見到極之違反公義嘅事,就抱打吓不平,遊行、示威、上網、上電視電台表吓立場,參加吓抗爭活動,企喺道義嗰邊… …。

香港年年維園六四燭光晚會參加嘅人都坐滿咗好多個小型足球場,將爭取民主自由決心展示全球。但係英國將掌上明珠送畀共產黨管治24年後,就冇呢支歌仔唱喇!喺世界上唔同嘅地方都有捨生取義嘅志士與義工,為人類作出貢獻共犠牲,得到世人景仰追隨。自2019年起,中共病毒荼毒至今,人間形同鬼域,全球死守工作崗位嘅人員,直與日月同光!

點解人人日日要返工,又有人走去學投資,天天走去捐錢窿呢?冇資本嘅返工係為咗養家活口,有資本嘅希望投資獲利。兩者除咗個人直接受惠,獨立自主之外,仲可以惠及家人同親朋戚友。推而廣之,可以為建設團體、社會、國家盡點力;更進一步,可以為地球村做少少事,比如助養兒童、捐助希望工程、宣傳環保、守護地球… …。

之不過,而家咁嘅時勢,想做好人真係唔容易,要有信心、勇氣同毅力。地球上壞人其實唔多,只係能夠堅持原則嘅好人比較少啫!「施比受更為有福」,請問:您願意當個施者,定係做個受者呢?

作者: Boss & Helen Lin

隨緣順心 ‧ 快活優遊 立己達人 ‧ 退而不休