您有幾加拿大 ‧ O Canada

1、經常唔鎖門 ,因為買咗燕梳。

2、銀包入面嘅現金唔會超過50仙, 小到士多, 遠到鄉村,就算買杯9毫9嘅咖啡都可以碌卡;冇信用卡嘅咶,就邊度都唔駛去。

3、好多人每個星期都會買649發吓夢,中大獎 ;一般打工仔,除咗中649有機會發達。賺幾多都好,抽完稅、供退休金、供失業保險金、供屋供車、交工會會費、畀保險費、攪掂開門七件事、消閒餘娛樂之後,所剩無幾。灰色收入機會極少,打政府工連油水都冇滴。越係老嘢,越鍾意買649。

4、每年至少見會計師兩次;第一次係報稅,另一次係諮詢點樣可以合法少交或者延交稅。

5、日日飲咖啡, 最鍾意 幫襯Tim Hortons 。

6、每4個艱難大人, 其中1個單身、1個離異有兒女、1個有同/異性伴侶、1個就結咗婚有兩個細路仔。75%家庭養有貓或狗,仲視同家人。

7、出門唔帶雨遮、紙巾; 幾曬都唔會遮太陽。

8、上扶手電梯時會自動自覺企埋右邊, 留返左邊畀給趕時間或者心急嘅行人。

9、後生仔女,或者孤家寡人鍾意住近市中心Downtown 多層住宅大廈;到打算結婚或者有細路先搬走去住有前後花園嘅獨立屋。

10、做乜,幾急都會排隊, 唔會搏懵打尖。

11、揸車嘅自動自覺遵守交通規則;三更半夜鬼影都冇隻嘅時候,都會等紅燈轉綠燈。一上車就搵安全帶,,無論揸車定搭車嘅都一樣;細路仔、貓貓狗狗都要安置好!

12、無論喺公共場所或者係自己屋企,垃圾都會分類 :可回收、不可回收、電池、廢舊電器等,放便循環再用。

13、出入公眾地方或寫字樓推門時, 擰轉頭睇睇後面有冇人嚟緊,有就hold住度門等人入埋先放手,或者畀下一位接手。

14、無論喺辦公室上班、或者課室上堂,都鐘意食零食,尤其是甜嘅或者脆嘅零食。

15、$80嘅衫唔打5折絕對唔買,$800 嘅 iPhone 啱啱上市就買。

16、幾舊嘅餐具都捨唔得掉, 收拾乾淨之後,轉賣或送畀人。夏天會喺自己車房前車道做Garage Sale 擺地攤,賣唔再需要嘅嘢。

17、逢年過節,尤其是聖誕節,歡天喜地咁送家人、朋友、同事、助理或僱員禮物或都賀卡。

18、每次出外度假或旅行, 都會帶啲小禮物或紀念品畀同事或僱員。

19、街上遇到三九唔識七嘅路人,或者左鄰右里,都會微笑點頭。

20、賣出自己間屋搬走時,都會買盆花或小裝飾品, 寫張充滿祝福同溫情嘅賀卡, 留低畀新主人。

21、著衫打扮睇場合,而唔係睇牌子或價錢。 日常著裝認真隨便,畀面啲就叫樸素。但係每星期返教會,或婚喪嫁娶,例牌男嘅西裝,女嘅禮裙禮帽。正式派對絕對講究,老婦少女一律晚禮服露肩擠胸香水首飾齊備。萬聖節 (Halloween) 派對又會奇裝異服,幾誇張獨特都得。

22、同朋友出街食飯 AA 制; 壽星仔邀請你去餐廳參加生日派對, AA 制; 同事生日聚餐, AA 制, 唯一唔駛夾錢嘅就係壽星仔/女, 其他人就羅漢請觀音。(所以, 加國嘅飯局都係開心真情嘅,絕對唔係應酬; 能夠同台食飯嘅, 絕對係非常老死嘅兄弟或者姊妹; 而且唔使禮尚往來, 唔使講排場、排座次、冇得食阿公)。

23、最尊貴嘅客人或者好好嘅朋友先會邀請到自己屋企食晚飯, 而唔係去餐館。所以即使共事幾十年, 都未必知道對方住響邊度。

24、做亞媽嘅都會做蛋糕或打理園藝; 做老豆嘅都要識得家居小保養維修,架車自己換水撥、電池…剪草。一來艱難大人工好貴,二來艱難大人以自己動手為榮。

25、男人唔敢輕易結婚生仔。 婚後以家庭兒女為重心,幫老婆手做家務、湊仔喂奶換屎片;冇保姆,非不得已搵父母幫手,仲要係暫時性質。男人離婚一次,即係破產一次,,因為要分一半身家畀女方, 同時支付兒女同前妻嘅生活費用。所有前妻都有份繼承遺產。唔敢養二奶,小三,因為養唔起!

26、一到18歲,一般都預咗父母唔再負責自己嘅生活開支,或者讀大學嘅費用,祇有少數族裔例外。子女成年之後,都唔會畀錢仔女買樓,更加唔會幫手湊孫仔,亦唔同仔女住,唔靠仔女養老。

27、萬事預約。睇醫生、整車、剪頭髮;哪怕同老朋友食飯, 甚至叫的士嘅都要預約。

28、冇OT(加班)或公關應酬, 如果業務需要, 通常係日頭會面或午餐會議.

29、鍾意渡假 (vacation) 而唔係旅遊 (travel)。 渡假係家人朋友揀一個地方住一兩個星期,旅遊係周圍走觀景點影相打卡。冬天係渡假旺季,打工仔酷愛去熱帶,五星服務又超級平嘅古巴;中產去佛羅里達;退休人士或有細路嘅夫婦愛坐郵輪 cruise.

30、聖誕節前捐贈食物畀 food bank 。

31、舊衣服洗乾淨包好,仲用得嗰啲家居用品、書刊文具、裝飾品、小擺設,同埋仲玩得嘅玩具,收拾好,送去救世軍度,畀佢大平賣當做捐贈。

32、至少為一個或以上自己信任的慈善機構捐款。我哋只有3600多萬人口,但至少有85000個慈善機構, 係全球最樂於行公義,好憐憫嘅國家之一。

33、唔關心本國政治,只在選舉投票之前,關心邊個政黨令自己少交啲稅;邊個政黨會浪費自己交咗嘅稅。

34、唔關心國際事務, 地理知識貧乏.

35、一生至少為以下其中呢啲機構或活動做過一次或多次義工:教堂、醫院、學校、社區、市政、老人院、家暴避難所、流浪者之家、癌症基金、乳腺癌基金、殘疾基金、音樂節、電影節、演唱會等等。

36、無論係急症或者家庭醫生轉介入醫院,由踏入醫院門口開始,到出返嚟,係一毫子費用都唔使;非醫療保健系統成員除外!

37、尊重法制,奉公守法,法律之前,人人平等;尊重多元文化,包容不同信念。

38、自愛亦能愛人,無為而又無所不為!

作者: Boss & Helen Lin

隨緣順心 ‧ 快活優遊 立己達人 ‧ 退而不休

在〈您有幾加拿大 ‧ O Canada〉中有 1 則留言

留言功能已關閉。